Urtarrila, 2011

Eusko Jaurlaritzaren Kultura Sailak eta San Telmo Museoak museo- eta erakusketa-eskaintza koordinatu bat garatuko dute hurrengo urteetan, Donostiako alkate Odon Elorzak eta Eusko Jaurlaritzako Kultura sailburu Blanca Urgellek gaur museoan sinatu duten hitzarmenaren arabera.

Hitzarmenak bi lankidetza-ildo ezartzen ditu: lehena, erakusketa-arloko eskaintza eta horrekin lotutako jarduerak San Telmo museoan garatzearekin lotua; bigarrena, museo-zerbitzu modernoak, koordinatuak eta herritar guztientzako irisgarriak ematearekin lotua, betiere Euskadiko Museoen Legean ezarritakoari jarraiki.

Ildo horretan, Eusko Jaurlaritzak konpromisoa hartu du aldi baterako erakusketen eta lotutako jardueren urteko finantziazioan parte hartzeko, 2011n 300.000 euro eta hurrengo ekitaldietan 350.000 euro emanez.

Informazio gehiago hemen.

Urgull mendiarekin paraleloan dihoan eraikin berriaren fatxada ikusgarrian landareak jartzeko lanak amaitzeko zorian daude jadanik.

Zein landare mota jarri erabakitzeko gehiegi haziko ez diren landareak aukeratu dituzte Leopoldo Ferránek eta Agustina Oterok –ez bolumenean ez eta luzeran ere-, eta fatxadaren zati bakoitzaren ezaugarriak kontutan hartuta banatu, batik bat eguzkitan edo itzaletan egongo diren kontutan hartuta. Nolabait lehen bertako horma naturalean aurki zitezkeenaren isla izan daitezkeen espezieak dira aukeratutakoak (Trinitate plazara ematen duen harrizko horman hauetako barietate batzuk aurki daitezke gaur egun, oraindik).

Eguzkia jasotzen duten parteetan Sedum, Frankenia, Thymus eta Armeria espezieak daude; itzaletan geratzen diren parteetan, aldiz, Soleirolia eta Ophiopogon espezieak.

Lanaren eragozpen nagusia kasu honetan aldamioetatik materiala igotzea eta montatzean egon da, baina fatxadan bertan landatzeak ere badu bere zailtasuna, aluminiozko panelen zulo kantitatearen eta tamainaren araberakoa. Izan ere, aluminizoko panelen atzetik ureztatze sistema dago eta aurrealdetik egin da landaketa.

Hemendik aurrera, landareak nola hazten doazen ikusteko eta sor litezkeen arazoak konpontzeko jarraipena egingo da, eta udaberrirako nahi bezala egotea espero da.

San Telmo Museoaren berrikuntza proiektuaren lanak egiterakoan, elizako gangan XVI. mendeko pinturak aurkitu ziren 2009an eta zaharberritu ondoren, hauei buruzko ikerketa bat egitea eskatu zitzaion Euskal Herriko Unibertsitateko irakaslea den Pedro Echeverríari. Orain, ikerketa amaitutzat eman daiteke eta aditu honi esker ez soilik pinturak, baizik eta eliza beraren eta komentuaren ikuspegi berria ematen duen informazioa argitara atera da. Izan ere, pinturak garrantzitsuak direla argi geratu da, baina uste baino dimentsio handiagoa izan zuen elizan egindako lanak eta, lan hau gure egunetara osorik iritsi ez den arren, fundatzaileen tribuna, desagertutako erretaula eta beste elementu batzuek San Telmo Europako egileekin lotzen dute.

Honi buruzko informazioa biltzen duen txostena jarri dugu hemen.

Hobekuntza lanak egiteko egun batzuz itxita egon ondoren, irekita dago berriro Historiaren Etxea, bere neguko ohiko ordutegiarekin: asteartetik ostiralera 10:00etatik 14:00etara eta 15:00etatik 17:30etara eta asteburu eta jaiegunetan 10:00etatik 17:30etara, astelehena itxiera eguna izanik.

Ordutegi hau apirilaren 30era bitartean mantenduko da, Aste Santuan ezik, egun horietan 10:00etatik 17:30etara ordutegi jarraia egingo da eta.