erakusketa

2400 bisita inguru izan ditu San Telmo Museoan amaitu berri den “Historiaurrearen abentura Gipuzkoan” erakusketak. Gainera, hauetatik, erdiak baino gehiagok erakusketarekin batera antolatu diren hitzaldi, bisita eta tailer didaktikoetan parte hartu du.

Erakusketaren osagarri gisa egin diren jarduerek oso harrera ona izan dute, batik bat 2011ko azaro eta abendu bitartean programatutako adituen bost hitzaldiek eta erakusketa osoan zehar egin diren familia eta taldeentzako tailerrak.

Hitzaldien artean Juan Luis Arsuaga arkeologoarena nabarmendu zen. Ekitaldi aretoa betetzeaz gain, beste areto bat ireki behar izan zen kanpoan gelditu zen jendeak hitzaldia zuzenean jarrai zezan, proiektore baten bidez. Tailerretan ere, 65 familiak eta 11 taldek parte hartu dute, 520 pertsona inguru, hain zuzen.

Aranzadi Zientzia Elkartearekin lankidetzan egin den lan honek Gipuzkoan historiaurreko arkeologiak izan dituen ikerketa etapa desberdinak jorratu ditu. Erakusketa ikusteko gogoz gelditu denak aukera izango du aurrerago, San Telmotik Gipuzkoako beste hainbat herrietara eramateko asmoa baitu Aranzadi Elkarteak.

“Fellini, Fellini y ….Fellini”, honela dio bisitarien liburuan dagoen idatzia. “¡Iremos al infierno con tu obra” aipatzen du tonu satirikoan beste batek. San Telmo Museoan dagoen Federico Fellini. Ilusioen zirkua erakusketak erreakzio ugari sortu ditu bisitariengan: marrazkiak, artistari eskainitako testuak, esker oneko mezuak…badirudi zinegile italiarraren sortze lanak inspiratu egiten duela gerturatzen de oro.

Museoan dagoen erakusketa honek sentsazio ezberdinak sortzen ditu bertaratuen artean eta askok beraien iritzia adierazi nahi izan dituzte bisitarien liburuan: “gracias por haberme hecho soñar” edo “recuerdos de juventud. Estupendo” komentario nostalgikoenen artean daude. Egon dira baita ere idatzi alaiak, besteak beste: “sólo se vive 1 vez, ¡disfrutémoslo!”, “hoy la vida es dolce!” edo “en honor a Fellini, y a su fabuloso mundo, ¡vamos a brindar con Martini y champan!”

Zinemagileak ederki islatu zuen bere irudimena berak sortutako ametsen liburuan. Lan honek ere bisitarien alde sortzaileena piztu du, emakumeen marrazki iradokitzaileen edota Felliniren zineko irudi ezagunenen zirriborroen bidez. Hausnarketa interesgarriak egiteko ere balio izan du, adibide dira “los genios desmenuzan lo cotidiano, rebasan la esfera de lo creíble y perduran eternamente, ¿o no?” edo “creo que desde hoy yo también inventaré mis recuerdos” bezalako esaldiak.

Eskerrik asko, grazie, gracias, thank you…jendeak behin eta berriro eskertu dio zinegileari bere jeinutasuna eta museori zoriondu dio erakusketagatik: “Erakusketa hagitz polita da! Merezi du ikustea!, “un homenaje necesario a un maestro inmortal. Zorionak!”, “estravaganzza!! Bravo” o “liluratua noa”. Baten batek erakusketari buruzko artikulua ere idatzi du bere blogean.

Gogorarazten dizuegu doan bisitatu dezakezuela erakusketa urtarrilaren 8ra arte eta egunero doako bisita gidatuak daudela, 17:00etan euskaraz eta 18:30ean gazteleraz. Asteburutan ere badira bisita gidatuak goizez.

Mota desberdinetako jarduerak programatuta daude aste honetan San Telmo Museoan, “6 mila milioi Beste” erakusketarekin lotuta.

Bihar, osteguna, uztailak 14, Alboan GKE-aren laguntzarekin, erakunde honen bitartez munduko leku ezberdinetan bolondres lanetan ibilitako pertsonek bere esperientzia azalduko digute Ekitaldi Aretoan, 19:30etan hasita.

Ostiralean, helduen ipuinak izango ditugu areto bedinean, 20:00etatik aurrera. Lehenago Japoniako eta Afrikako ipuinak hurbildu zizkiguten herri horietako kontalariek eta oraingoan Euskal Herriko ipuinen txanda izango da, Virginia Imaz kontalariaren eskutik, gazteleraz.

Larunbatean, aldiz, txikien txanda izango da. Museoko Liburutegian, 18:30etan hasita, bost urtetik gorakoentzat Amerikako ipuinak kontatuko ditu, euskaraz, Maite Franko ipuin kontalariak (argazkian).

Hiru jardueratara sarrera librea izango da, lekuak bete arte.

Bide batez, gogoratu erakusketaren ordutegia 22:00ak artekoa dela, sarrera prezio murriztuarekin 20:00etatik aurrera eta ekitaldi aretoan, jarduerarik ez dagoenean, ETBrekin lankidetzan erakusketaren galderak bertakoei egin ondoren sortutako bideo berria ikusgai dagoela etengabe: “6 mila milioi Beste: hemen bertako begiradak”.

Gaur goizean aurkeztu da (FAB)BOTS. Diseinu eta fabrikaziorako makina eta robot pertsonalizatuak erakusketa, Bartzelonako Disseny Hub-ek ekoiztua. San Telmo Museoko Laborategia gunean irailaren 11ra bitartean ikusgai izango dena.

Erakusketa hau aurkezteko prentsaurrekoan parte hartu dute Marta Malé-Alemany-k, komisarioak; Eva Joan-ek, Disseny Hub-eko kanpo Harremanetarako arduradunak (biak irudian); Antton Azpitartek, Donostia Kulturako zuzendariak; eta Carmen Garmendiak, San Telmo Museoko Aldi Baterako erakusketen arduradunak.

Honekin, Laborategia guneko jarduerei hasiera ematen zaie. Bertan, erakunde ezberdinekin lan egingo du museoak mota askotariko proiektuetan.

Erakusketari buruzko informazio gehiago, hemen.

Gaur goizean aurkeztu da San Telmo Museoan Euskal Telebistako lantalde batek “6 mila milioi Beste” erakusketaren harira egindako bideo berria.

EITBrekin hitzarmenaren bitartez lotutako lankidetzaren emaitza da hau, eta museoan abuztuaren 21era bitartean ikus daitekeen erakusketa osatzera dator, bertakoen ikuspegiarekin. ETBko ekipoa Euskal Herrian zehar ibili da grabaketak egiteko eta elkarrizketatuek GoodPlanetek prestatutako 40 galderak erantzun dituzte.

Emaitza, alde batetik, Euskal Telebistan ikusi ahal izango da gaur bertan lehenengo saio batekin eta uztailaren 1ean biagrren zatiarekin. Bestalde, museoak bihartik aurrera ikusgai jarriko du Ekitaldi Aretoan erakusketako beste bideoek bezala ordu erdi inguruko iraupena duen pieza, eta etengabe ikusi ahal izango da, jarduerak daudenean ezik.

Argazkian, ezkerretik eskubira, gaur goizeko aurkezpenean parte hartutakoak: José Mª Argoitia, elkarrizketak egin dituen lantaldeko kidea; Susana Soto, San Telmo Museoko zuzendaria; Nerea Txapartegi, Donostiako Udaleko Kultura eta Euskara delegatua; Alberto Surio, EITBko Zuzendari Orokorra; Patxi Arratibel, EITBko Estrategia eta Kanpo Harremanetarako burua; eta Gentzane Martínez de Osaba, bera ere lana egin duen taldeko kide.

Datorren asteazkenean, ekainak 1, San telmo Museoan abuztuaren 21era bitartean ikusgai dagoen erakusketaren errealizazioa nolakoa izan zen gertutik ezagutzeko aukera izango da, Baptiste Rouget-Luchaire-ren hitzaldiari esker.

Museoko ekitaldi aretoan egingo da hitzaldia, 20:00etan hasita, eta bertan, munduan zehar milaka lagun elkarrizketatzera eraman duen GoodPlanet Fundazioaren eta Yann Arthus-Bertrand-en proiektuaren nondik norakoak ezagutzera emango ditu bere egileetako batek. Izan ere, erakusketa osatzeko 78 herrialdeetan barrena 5.600 pertsona baino gehiagok 40 galderako galdeketari emandako erantzunak bildu dira.

Hitzaldia frantsesez izango da, euskara eta gaztelerazko itzulpenarekin. Sarrera librea izango da, lekuak bete arte.

Argazkiaren copyright-a: Florian Geyer/6 milliards d’Autres/ GoodPlanet

Gaur, maiatzaren 19a, osteguna, Fuensanta Nieto eta Enrique Sobejanoren MUGARRIA-Muga natural eta hiritarra erakusketa irekiko da, Leopoldo Ferrán eta Agustina Oterorekin elkarlanean.

Erakusketa maiatzaren 28ra arte egongo da irekita Madrilgo Raquel Ponce Galerian.

Proiektu arkitektonikoaren bihotzean mugaren kontzeptua bere osaketa espazial eta formalaren oinarri bezala ageri da. Muga horren materializazioa modu garden edo lauso, gogortasunez edo leuntasunez, arintasuna edo pisua adieraziz azaleratzea ez da garrantzirik gabeko erabakia, izan ere, gaur egungo hiriek aurre egin behar izaten dieten hausturen aurrean hartutako jarrera islatzen du. Gutxitan jartzen dira bata bestearen ondoan haustura hauek hain modu argi eta orekatuan, Urgull Mendiaren eta Donostiako Alde Zaharraren arteko lotura gunean gertatzen den bezala: natura eta hiriaren artean; plano horizontala eta altxatze topografikoaren artean; lurra eta itsasoaren artean; eraikin historiko eta gaur egungo eraikinen artean. Beharbada, horregatik, San Telmo Museoaren eraberritze eta handitze proiektuak, paisaia natural eta paisaia hiritarraren arteko elkargunean kokatuta, erantzun konsziente bat eskatzen zuen muga izatearen berezko izaera horrengatik, horma hautsiak irudikatua, proiektuan sumatzen den natura eta naturaltasunik ezaren arteko aurkakotasun horren adierazpen modura.

Pantaila edo zursare batek, aukera honetarako espresuki sortutako aluminiozko piezen konbinaketa joku batetik abiatuta sortutakoak, arte publikoari dagokionez arkitekturak jokatzen duen papera onartzen du. Urtaroak igarotzen diren heinean, San Telmo Museoaren zabaltze berria aldatzen joango da, Urgull Mendiaren landaredian murgilduaz edo bere autonomia adieraziz, amaitu gabeko horma luze eta hautsian: zehaztu gabeko mugaren ezusteko metafora, non arkitektura eta hiria paisaiarekin aurkitzen diren.

Fuensanta Nieto eta Enrique Sobejano

Leopoldo Ferrán eta Agustina Otero

Datorren igandetik aurrera, maiatzaren 1etik aurrera, martxan jarriko ditu San Telmo Museoak programatutako bisita gidatuak. Igande honetatik aurrera, asteburu guztietan, bisita gidatuen programazio egonkorra eskainiko du museoak, euskaraz, gazteleraz, ingelesez eta frantsesez.

Museoaren sarreraz aparte, pertsonako 3 euroko prezioa izango du bisita hauetan parte hartzeak eta ez beharrezkoa izango aurretik izena ematea. Gehienezko kopurua, dena den 25 lagunekoa izango da ahalik eta modu erosoenean egin ahal izateko, eta hasi baino 10 minutu lehenago egotea gomendatzen da.

Ordutegia honakoa izango da:

-Euskaraz: 11:30 eta 17:00

-Gazteleraz: 13:00 eta 18:30

-Frantsesez: 15:39

-Ingelesez: 11:00

Bisitaren iraupena 90 minutu ingurukoa izango da.

Gaur goizean aurkeztu dugu San Telmo Museoaren erakusketa iraunkorra, bihar bertan publikoarentzako zabalduko dena.

Horretarako, prentsaurrekoa eta bisita izan dira gaur goizean, bertan honakoak izan direlarik: Patxi López, Lehendakaria; Mª Jesús Aranburu, Kultura Diputatua; Odón Elorza, Donostiako alkatea; Denis Itxaso, Kultura Zinegotzia; eta Susana Soto, museoko zuzendaria.

Bisitan zehar bihartik aurrera hiritarrek ezagutu ahal izango dituzten espazioak eta erakusketaren atalaka ezagutu dituzte: Historia eta Erronkak elizan, Espiritualtasun zeinuak, Aztarnak oroimenean, Modernitatearen hasiera eta Arte Bilduma Historikoa.

Aipatu beharrekioa da bihar, museoa osorik zabalduko den lehen eguna, asteartea izanik, dohainik satru ahal izango dela, 10:00etatik 20:00etara bitartean.

Informazio gehiago, hemen.

Gaur aurkeztu da San Telmo Museoan, prentsaurrekoan, erakusketa iraunkorraren barne egongo den Arte Ederren atala. Horretarako, Odón Elorza, alkatea, Denis Itxaso, kultura zinegotzia eta Carmen Garmendia, erakusketen arduraduna egon dira.

Datorren astean, hilaren 19tik aurrera, museoa bere osotasunean irekitzen denean, atal honetan ikusi ahal izango denaren xehetasunak azaldu dituzte. Arte Ederretako atala, museoan, bi aretotan egongo da jarrita, bata euskal gizartearen XIX. eta XX. mendeetako bilakaera azaltzen duen atalari lotuta, “Modernitatearen hasiera” deritzonari, “Euskal Artearen 100 urte” titulupean. Bestea, museoaren Bilduma Historikoa titulupean, XV. mendetik XIX. mendera bitartean artearen historian zehar ibilbidea proposatzen duena da, planteamendu didaktiko bati erantzunda, museoaren funtsen bitartez.

Euskal Artearen partean egiten den ibilibidea hainbat epealdietan indartzeko, museoak itxita egon den bitartean eskuraketak egin ditu eta museo, erakunde, galeria eta partikularren gordailutzak jaso. Horri esker, “Modernitatearen hasiera” atalean jorratzen den garai historikoan, XIX. eta XX. mendeen artean gizarteak bizi zituen aldaketekin batera arteak zein bide jarraitzen zuen ere ezagutu daiteke San Telmoko erakusketan.

Informazio gehiago, hemen.