san telmo museoa

Donostiak talentua du, eta horrela islatuko du 72. Musika Hamabostaldiaren barruan antolatu den kontzertu honetan. San Telmo museoak Elena Barbe, Arantza Ezenarro eta Helena Orcoyen soprano donostiarrak bilduko ditu, bestelako kontzertu bat eskaintzeko. Emanaldian Guridiren, Offenfachen eta Haendelen lanak abestuko dituzte, beste batzuen artean.

Arantza Ezenarro

Iruñeko Ganbera Abesbatza geurera helduko da ostiral honetan, hilak 12, gaueko 22.30ean, Officium Defunctorum kontzertua eskaintzera. Emanaldiak Tomas Luis de Victoria konpositorea omentzea du xede, musikagilearen heriotzaren 400. urteurrena ospatzen den urte honetan. Josep Cabrek zuzenduta, sei ahotserako obra hau Errenazimenduko musikako obrarik adierazgarrienetako bat da. 72. Musika Hamabostaldiaren barruan antolatu den kontzertuan Quim Guerra baxoiak eta Patricia Gonzalez organujoleak hartuko dute parte.

Maisuen maisu Tomas Luis de Victoria (Avila,1548-Madril,1611) Espainiako Errenazimentu garaiko konpositorerik hoberenetarikoa da. Adituen aburuz, bere lana Italiako Giovanni Perluigi da Palestrina konpositore handiarenarekin aldera daiteke. Bere obraren eragina XX. mendera arte iritsi zen, non cecilianismo musika mugimenduko konpositoreek eredutzat hartu zuten.

Iruñeko Ganbera Abesbatza

Hilaren 21etik 25era Donostian ospatuko den Jazzaldiak aurten San Telmo Museoa izango du bere agertokien artean, berrikuntza bezala. Egitarau zabal baten barruan, museoan kontzertuak izango dira, denak gau partean eta eskaintza erakargarriarekin.

San Telmo Gauak uztailaren 22, 23 eta 24an izango dira, museoko espazio ezberdinetan: klaustroa, ekitaldi aretoa, patioa eta eliza. 22an, Mostly Other People Do The Killing (MOPDtK), Lloyd Cole Small Ensemble eta Kristin Asbjørnsen arituko dira; 23an, René Marie, Jan Bang: Poppies from Kandahar eta John Scofield Quartet. 24an, azkenik, Jan Garbarek & The Hilliard Ensemble.

22 eta 23rako sarrerak agortuta daude jadanik, ez horrela 24koak. Hala ere, Jazzaldiko zuzendari Miguel Martinek bere blogean dioen bezala, baliteke azken orduan aurretik erreserbatu bai baino jaso gabe geratutako sarreraren bat salmentan jartzea. Iragarriko dute Jazzaldiko arduradunek, hala bada. Eta leihatilan erosteko aukera izango da egunean bertan 23:45etatik aurrera.

Informazio gehiago hemen.

Mota desberdinetako jarduerak programatuta daude aste honetan San Telmo Museoan, “6 mila milioi Beste” erakusketarekin lotuta.

Bihar, osteguna, uztailak 14, Alboan GKE-aren laguntzarekin, erakunde honen bitartez munduko leku ezberdinetan bolondres lanetan ibilitako pertsonek bere esperientzia azalduko digute Ekitaldi Aretoan, 19:30etan hasita.

Ostiralean, helduen ipuinak izango ditugu areto bedinean, 20:00etatik aurrera. Lehenago Japoniako eta Afrikako ipuinak hurbildu zizkiguten herri horietako kontalariek eta oraingoan Euskal Herriko ipuinen txanda izango da, Virginia Imaz kontalariaren eskutik, gazteleraz.

Larunbatean, aldiz, txikien txanda izango da. Museoko Liburutegian, 18:30etan hasita, bost urtetik gorakoentzat Amerikako ipuinak kontatuko ditu, euskaraz, Maite Franko ipuin kontalariak (argazkian).

Hiru jardueratara sarrera librea izango da, lekuak bete arte.

Bide batez, gogoratu erakusketaren ordutegia 22:00ak artekoa dela, sarrera prezio murriztuarekin 20:00etatik aurrera eta ekitaldi aretoan, jarduerarik ez dagoenean, ETBrekin lankidetzan erakusketaren galderak bertakoei egin ondoren sortutako bideo berria ikusgai dagoela etengabe: “6 mila milioi Beste: hemen bertako begiradak”.

Zabalik dago 2011ko EHUko Uda Ikastaroen programaren parte den “Políticas de inmigración en Europa: ciudadanía europea y global” ikastaroaren izenematea. Kurtso hau Susana del Ríok zuzenduko du -Gobernantza Demokratikoaren Institutua, Donostia- eta Aieteko Bakearen Etxean eta San Telmo Museoan burutuko da abuztuaren 22an eta 23an, Gobernantza Demokratikoaren Institutuaren, Donostiako Udalaren, San Telmo Museoaren eta Kanadako enbaxadaren laguntzaz.

Azken urteotan, immigrazioarekin zuzenean edo europar gizarteen errealitate geroz eta anitzagorekin lotutako zirkunstantziek ikastaro honen gaia agenda politikoetan jarri dute: beloaren arazoa, tenpluen eraikuntza, errumaniarren egoztea… Eta interes handiko gaia izaten jarraituko duela dirudi. Kurtso honen helburua polemika hauek aztertzea da eta egungo Europan herritartasun eskubidea zer kontsidera daitekeen kontutan hartuta europar integrazioari buruzko irtenbide berriak proposatzea.

Herritartasunaren kontzeptuak bilakaera bat izan du, maila ezberdinetako eredu bat jarraitzen duen elkarbizitza eta hartuemana barne dauzkan dimentsio zabalago batera joaz.

XXI. mendeko Europar Batasunean, europar herritartasunak eta herritartasun globalak europar herritar izatea eta herritartasunen osagarritasuna zertan datzan birformulatzera garamatzate. Jokoan dagoena, kultura aniztasuna baino gehiago, eskubide berdintasuna eta herritartasun politikoa dira.

Abuztuaren 22ko saioa Aieteko Bakearen Etxean egingo da eta 23koa San Telmo Museoan.

Informazio gehiago hemen.

Gaur goizean aurkeztu da (FAB)BOTS. Diseinu eta fabrikaziorako makina eta robot pertsonalizatuak erakusketa, Bartzelonako Disseny Hub-ek ekoiztua. San Telmo Museoko Laborategia gunean irailaren 11ra bitartean ikusgai izango dena.

Erakusketa hau aurkezteko prentsaurrekoan parte hartu dute Marta Malé-Alemany-k, komisarioak; Eva Joan-ek, Disseny Hub-eko kanpo Harremanetarako arduradunak (biak irudian); Antton Azpitartek, Donostia Kulturako zuzendariak; eta Carmen Garmendiak, San Telmo Museoko Aldi Baterako erakusketen arduradunak.

Honekin, Laborategia guneko jarduerei hasiera ematen zaie. Bertan, erakunde ezberdinekin lan egingo du museoak mota askotariko proiektuetan.

Erakusketari buruzko informazio gehiago, hemen.

Gaur goizean aurkeztu da San Telmo Museoan Euskal Telebistako lantalde batek “6 mila milioi Beste” erakusketaren harira egindako bideo berria.

EITBrekin hitzarmenaren bitartez lotutako lankidetzaren emaitza da hau, eta museoan abuztuaren 21era bitartean ikus daitekeen erakusketa osatzera dator, bertakoen ikuspegiarekin. ETBko ekipoa Euskal Herrian zehar ibili da grabaketak egiteko eta elkarrizketatuek GoodPlanetek prestatutako 40 galderak erantzun dituzte.

Emaitza, alde batetik, Euskal Telebistan ikusi ahal izango da gaur bertan lehenengo saio batekin eta uztailaren 1ean biagrren zatiarekin. Bestalde, museoak bihartik aurrera ikusgai jarriko du Ekitaldi Aretoan erakusketako beste bideoek bezala ordu erdi inguruko iraupena duen pieza, eta etengabe ikusi ahal izango da, jarduerak daudenean ezik.

Argazkian, ezkerretik eskubira, gaur goizeko aurkezpenean parte hartutakoak: José Mª Argoitia, elkarrizketak egin dituen lantaldeko kidea; Susana Soto, San Telmo Museoko zuzendaria; Nerea Txapartegi, Donostiako Udaleko Kultura eta Euskara delegatua; Alberto Surio, EITBko Zuzendari Orokorra; Patxi Arratibel, EITBko Estrategia eta Kanpo Harremanetarako burua; eta Gentzane Martínez de Osaba, bera ere lana egin duen taldeko kide.

Bihar, asteartea, hilak 21, gaur ospatzen den Errefuxiatuaren Nazioarteko Egunaren harira mahai ingurua antolatu dugu San Telmo Museoan, museoan abuztuaren 21era bitartean ikus daitekeen “6 mila milioi Beste” erakusketan jasotzen diren hainbat testigantzarekin ere erlazionatuta. Horretarako, alor honetan urte luzez lanean dabiltzan bi erakundetako estatuko ordezkariak izango ditugu bertan: Amnistia Internazionaleko Alfonso López Borgoñoz (irudian) eta ACNUR-eko Maricela Daniel. Mahai ingurua Ekitaldi Aretoan izango da, 19:30etan hasita. Sarrera librea izango da lekuak bete arte.

Etzi, asteazkenean, ekainak 22, oso bestelako jarduera burutuko da Ekitaldi Aretoan. Izan ere, Museo Nacional de Ciencia y Tecnología delakoak Galileo Galileiren “Sidereus nuncius” (”Izarretako albistaria”) euskara, gaztelera, katalana eta galegora itzuli du, faksimil bertsioa ere barne duen argitalpen batean. Hori aurkezteko, hainbat parte hartzaile izango dira museoan antolatutako ekitaldi honetan, bakoitzak partehartze txiki bat izango duelarik: Ramón Núñez, MUNCYTeko zuzendaria eta proiektuaren egilea: “Posible significado del mensaje de Galileo en el siglo XXI”; Ricardo Díez Muiño, CSIC-UPV-EHUko zuzendari albokoa: “Elogio de la ciencia”; Ibon Sarasola EUSKALTZAINDIAko kidea: “Los libros científicos y el euskera”; Juan Ignacio Pérez Iglesias UPV-EHUko Fisiologia Katedraduna: “Ciencia y libertad”; Itziar Nogeras, ELHUYAR FUNDAZIOAREN zuzendaria: “Euskadin zientziaz duen ikusmoldea agertuz”; Daniel Innerarity, Gobernantza Demokratikoaren Institutuko Zuzendaria (GLOBERNANCE): “Elogio de la teoría”. Ekitaldiaren itxiera Cristina Uriarte, EHUko errektoreordeak egingo du. Sarrera librea izango da, lekuak bete arte.

Atzo Yann Arthus-Bertrand-ek egindako bisitaren ondoren -San Telmo Museoan abuztuaren 21era bitartean ikusgai dagoen “6 mila milioi Beste” erakusketaren egilea-, erakusketa honi lotutako jarduera berri bat burutuko da bihar. Izan ere, Javier Elzo soziologoak XXI. mendeko euskal gizartearen baloreei buruzko hitzaldia eskainiko du.

Hitzaldia, “Valores de la sociedad vasca para el siglo XXI” titulua duena, museoko Ekitaldi Aretoan izango da 19:30etan hasita, eta ondoren partehartzeari tartea irekiko zaio. Sarrera librea da lekuak bete arte.

Bestalde, bihar, areto berean “Mercados del mundo” titulupean mahai ingurua egingo dute Mikel Alonsok, Aitor Elizegik eta Santi Burutxagak, Gastro-kultura espazioak antolatutako ekitaldia, bertan ikusgai dagoen izen bereko argazki erakusketaren harira, 19:30etatik aurrera. Honetan ere, sarrera librea izango da lekuak bete arte.

Gaur, asteazkena, ekainaren 8a, 19:30ean, Zinemagintza Kolonbiarraren Zikloari hasiera emango zaio Colombia, sus pueblos indígenas y el problema lingüístico hitzaldiarekin, Jon Landabururen eskutik. Zikloa ekainaren 8, 9 eta 10 bitartean izango da.

Jon Landaburu, hizkuntzalari eta ikerlaria, kolonbiako hizkuntza indigenatan aditua, Kolonbiako aniztasun linguistikoari buruz arituko da. Kolonbian egun, 65 hizkuntza indigena, 2 krioilo eta erromaniera dago. 40 urtetako ikerketetan, hizkuntzen barne eta kanpo alorrak aztertu ditu.

Aurkezlea: Itziar Idiazabal, EHUren Munduko Hizkuntza Ondarearen UNESCO katedra, EHUko Hizkuntzalaritza eta Euskal Ikasketak Saileko zuzendaria.

Ekainaren 9 eta 10ean, zinemagintza Kolonbiarreko hainbat film ikusi ahal izango dira Museoko Areto Nagusian 20:00etan. In Vitro Visual Jaialdiak hautatutako filme labur kolonbiarren emanaldiak izango dira:

Osteguna, ekainaren 9a, 20:00 – 21:15:

ROJO RED, Fikzioa, fantastikoa, 2008, 13 min.

Zuzendaria: Juan Manuel Betancourt,

MARINA LA ESPOSA DEL PESCADOR, Drama, fantastikoa, 2009, 13 min.

Zuzendaria: Carlos Hernández

LINEA DE TIEMPO, Fikzioa, suspentsea, 2009, 12 min.

Zuzendaria: Fernando López

NO TODOS LOS RIOS VAN AL MAR, Fikzioa, drama, 2008, 27 min.

Zuzendaria: Santiago Trujillo

YO ME LLAMO MARIAN, Animazioa, 2008 10 min.

Zuzendaria: Ana María Caro

Ostirala, ekainaren 10a, 20:00- 21:15:

ESTO ES UN REVOLVER, Fikzioa, thriller, 2010, 21 min.

Zuzendaria: Pablo González

EL CORAZON DE LA MANCHA, Fikzioa, drama, 2010, 24 min.

Zuzendaria: Rubén Mendoza

CHIMBUMBE, Kolonbia – Mexiko, fantastikoa, 2008, 13 min.

Zuzendaria: Antonio Coello

ALIJUNA, Drama, 2010, 18 min.

Zuzendaria: Cristina Escoda