san telmo museoa

Atzo arratsaldean, Unesco-ko Konferentzia Orokorreko Lehendakari Davidson Hepburn (irudian bisiten liburuan sinatzen) museoan izan zen. 18:00etan, bertako erakusketetan zehar bisita egin ondoren, museoko klaustroan adierazpen batzuk egin zituen Odon Elorza, Donostiako Alkatea, eta Guillermo Echeniquerekin, Eusko Jaurlaritzako Kanpo Harremanetarako Idazkari Nagusiarekin, batera.

Aldi berean, bertan izan ziren Ainhoa Alday, Eusko Jaurlaritzako Kanpo Harremanetarako Zuzendaria; Daniel Innerarity, Gobernantza Demokratikoaren Institutuko Zuzendaria, eta Conchi Medrano, Unesco Katedra (Euskal Herriko Unibertsitatea); baita museoko zuzendari Susana Soto, Donostiako Kultura eta Gazteria zinegotzi Denis Itxaso eta udaletxeko hainbat ordezkari eta Unesco-ko ordezkariaren bisitarekin zerikusia zuten beste hainbat erakunde ere.

Mariasun Landaren irakurketa literarioak irekiko du, jarduerei dagokienean, maiatzaren lehen astea San Telmo Museoan.

Asteazkenean, maiatzaren 4an, museoko ekitaldi aretoan “Beldurrarentzako antidoto literarioak” titulua duen irakurketa egingo du, euskaraz, 19:30etan hasita, “Giza harremanak, ulertzeko entzun” zikloaren barne. Sarrera librea izango da, lekuak bete arte.

Ostiralerako, hilaren 6rako, aurreikusita zegoen Sami Naïr-en hitzaldia atzeratu behar izan dugu egilearen agendako azken orduko betebeharrak direla eta.

Aldiz, “2.0 iraultzak? Gizarte-sareen zeregina mundu arabiarreko aldaketa politikoetan” titulua duen hitzaldia egingo da museoko Ekitaldi Aretoan, egun honetan bertan. 19:30etatik aurerra, Sofiène Ben Haj M’Hamed, Tunisiako blogari aktibo eta nabarmenenetako batek, eta Lorena Fernández, Deustuko Unibertsitateko irakasle eta CRAI (Centro de Recursos para el Aprendizaje y la Investigación) erakundeko arduradunak, gizarte-sareek arabiar mundua eraldatzen ari diren hiri-mugimenduetan duten zereginaz jardungo dute. Sarrera librea lekuak bete arte.

Astea amaitzeko, larunbatean, hilak 7, Persépolis musika taldeak -Shahryar Zarrin Panjeh, Pedram Khosravi, Maryam Mahdavi Pour- musika pertsiarra eta Sufi musika mistikoa interpretatuko dute museoko klaustroan, 19:00etan hasita, Munduko musika zikloaren barne. Museoko sarrerarekin, lekuak bete arte.

Datorren igandetik aurrera, maiatzaren 1etik aurrera, martxan jarriko ditu San Telmo Museoak programatutako bisita gidatuak. Igande honetatik aurrera, asteburu guztietan, bisita gidatuen programazio egonkorra eskainiko du museoak, euskaraz, gazteleraz, ingelesez eta frantsesez.

Museoaren sarreraz aparte, pertsonako 3 euroko prezioa izango du bisita hauetan parte hartzeak eta ez beharrezkoa izango aurretik izena ematea. Gehienezko kopurua, dena den 25 lagunekoa izango da ahalik eta modu erosoenean egin ahal izateko, eta hasi baino 10 minutu lehenago egotea gomendatzen da.

Ordutegia honakoa izango da:

-Euskaraz: 11:30 eta 17:00

-Gazteleraz: 13:00 eta 18:30

-Frantsesez: 15:39

-Ingelesez: 11:00

Bisitaren iraupena 90 minutu ingurukoa izango da.

Aste Santuan San Telmo Museoak 6 eta 12 urte bitarteko haurrentzako tailerrak programatu ditu.

Hilaren 19tik 22ra eta 26tik 29ra (asteartetik ostirlarera) museoarekin eta ikusgai dagoen aldi baterako “6 mila milioi Beste” erakusketarekin zerikusia duten tailerrak egingo dira.

17:00ak eta 19:00ak bitartean hurbiltzen direnei zuzentzen zaizkie tailerrak. Lau tailer ezberdin dira, ordu laurdeneko tartearekin bata bestearen jarraian hasiko direnak, denak Hezkuntza Tailerrean burutuko direnak, eta horrela, edozein momentutan etorrita ere, parte har daiteke.

Jarduera bakoitzak ordu erdiko iraupena du eta horrela, parte hartzaile bakoitzak ordu erditik bi ordutara eman ditzake.

Ez da aurrez izena eman behar eta doakoak dira, lekuak bete arte.

Gaur goizean aurkeztu dugu San Telmo Museoaren erakusketa iraunkorra, bihar bertan publikoarentzako zabalduko dena.

Horretarako, prentsaurrekoa eta bisita izan dira gaur goizean, bertan honakoak izan direlarik: Patxi López, Lehendakaria; Mª Jesús Aranburu, Kultura Diputatua; Odón Elorza, Donostiako alkatea; Denis Itxaso, Kultura Zinegotzia; eta Susana Soto, museoko zuzendaria.

Bisitan zehar bihartik aurrera hiritarrek ezagutu ahal izango dituzten espazioak eta erakusketaren atalaka ezagutu dituzte: Historia eta Erronkak elizan, Espiritualtasun zeinuak, Aztarnak oroimenean, Modernitatearen hasiera eta Arte Bilduma Historikoa.

Aipatu beharrekioa da bihar, museoa osorik zabalduko den lehen eguna, asteartea izanik, dohainik satru ahal izango dela, 10:00etatik 20:00etara bitartean.

Informazio gehiago, hemen.

Asteburu hau ere aurkeraz beteta dator San Telmon. “6 mila milioi Beste” erakusketa bisitatzeko aukeraz gain, larunbata eta igandean jarduerak programatu dira.

Bihar, larunbata, dantza herrikoiak ikasi eta praktikatzeko aukera egongo da Zuloaga Plazan arratsaldeko 18:00etatik aurrera Herri Dantza dantza taldearen laguntzarekin.

Igandean, aldiz, Donostia Kulturak antolatzen duen Musika Sakratuaren zikloa itxiko duen kontzertua egongo da klaustroan. 20:15etik aurrera, Urmulli georgiar boskotea eta Maddi Oihenart abeslaria arituko dira. Museoko sarrerarekin.

Gaur aurkeztu da San Telmo Museoan, prentsaurrekoan, erakusketa iraunkorraren barne egongo den Arte Ederren atala. Horretarako, Odón Elorza, alkatea, Denis Itxaso, kultura zinegotzia eta Carmen Garmendia, erakusketen arduraduna egon dira.

Datorren astean, hilaren 19tik aurrera, museoa bere osotasunean irekitzen denean, atal honetan ikusi ahal izango denaren xehetasunak azaldu dituzte. Arte Ederretako atala, museoan, bi aretotan egongo da jarrita, bata euskal gizartearen XIX. eta XX. mendeetako bilakaera azaltzen duen atalari lotuta, “Modernitatearen hasiera” deritzonari, “Euskal Artearen 100 urte” titulupean. Bestea, museoaren Bilduma Historikoa titulupean, XV. mendetik XIX. mendera bitartean artearen historian zehar ibilbidea proposatzen duena da, planteamendu didaktiko bati erantzunda, museoaren funtsen bitartez.

Euskal Artearen partean egiten den ibilibidea hainbat epealdietan indartzeko, museoak itxita egon den bitartean eskuraketak egin ditu eta museo, erakunde, galeria eta partikularren gordailutzak jaso. Horri esker, “Modernitatearen hasiera” atalean jorratzen den garai historikoan, XIX. eta XX. mendeen artean gizarteak bizi zituen aldaketekin batera arteak zein bide jarraitzen zuen ere ezagutu daiteke San Telmoko erakusketan.

Informazio gehiago, hemen.

San Telmo Museoak, Bagera elkartearekin eta Donostiako Euskararen Udal Patronatuarekin elkarlanean, “6 mila milioi Beste” erakusketaren inguruan Mintzodromoaren hiru saio antolatu ditu. Hauek burutzeko, gainera, Donostiako euskaltegien laguntza ere izango dugu.

Saio hauek apirilaren 13an, maiatzaren 11n eta ekainaren 8an burutuko dira museoan bertan, eta erakusketak jorratzen dituen gaien artean batzuei buruz euskaraz hitzegiteko aukera emango dute.

Saioak goizez eta arratsaldez egingo dira aipatutako data bakoitzean, 10:00tik 12:00ra, goizez (ordubeteko bi saio, lehenengoa 10:00ean hasita eta bigarrena 11:00etik aurrera) eta 16:00tik 18:00ra arratsaldez (hemen ere bi saiotan, 16:00ean lehenengoa eta 17:00ean bigarrena).

Bihar goizeko bi saioak jadanik beteta daude, baina posible da arratsaldekoetan parte hartzeko izena ematea, ondorengo helbidean: mintzalaguna@bagera.net.

Argazkian, Donostiako Euskararern Udal Patronatuak Euskararen Egunaren inguran antolatutako Mintzodromoa.

Pasa den asteburuan museoaren berrirekiera zela eta eginako ateak zabalik egunetan hartutako 16.000 bisitarien ostean, asteburu honetarako bi kontzertu programatu dira.

Alde batetik, bihar, hilak 9, arratsaldeko 19:00ean, Doinu Zahar Kamara Abesbatzak musika erlijiosoa, John Dowland konpositore inglesaren lanak eta euskal folklore lanak eskainiko ditu museoko klaustroan.

Bestetik, igandean, hilak 10, arrtasaldeko 19:00ean Donostiako talde barrokoa eta Kresala dantza taldeak Scarlatti, Mozart, Vivaldi, Haendel eta Purcell-en lanak eskainiko dituzte museoko klaustroan. Eguraldi txarrarekin lekuz alda liteke.

Bi kontzertu hauetara museoaren sarrerarekin sartu ahal izango da.

Museoko ateak zabalik jardunaldietako lehenengoa bukatzear dagoenean, 9.000 lagunetik gora pasa dira dagoeneko San Telmotik publikoari irekitako lehen egun honetan.

Gaur bertaratu direnek zabalkuntzako eraikinaren espazio berriak ezagutzeko aukera izan dute, hala nola, 6 mila milioi Beste erakusketa, museoarekin batera gaur ireki dena. Gainera, egunean zehar elizan iikusentzunezkoaren paseak egin dira, txandaka euskaraz eta gazteleraz.

Bihar, ateak zabalik bigarren eguna izango da, eta jarduerak burutuko dira, plazan goizez eta museo barruan arratsaldez. Ordutegia berdina izango da, 10:00tik 20:00ra.